তুমি দুখ নকৰিবা

তুমি দুখ নকৰিবা

বহুদিনেই হ'ল তোমাক মুকলি কৰি নিদিয়াৰ,
আৱদ্ধ কৰি ৰাখিছো সংগপনে বুকুৰ গভীৰতাত
দুষ্ট তুমি,
জানো ওলাই আহি আকৌ কাৰোবাৰ হৃদয় চুৰি কৰা!
মোৰ ইমান কোঠালি নাই বুকুত সকলোকে ৰাখিবৰ,
নুবুজা তুমি,
দুষ্ট তুমি....

থাকা,
অনুভৱৰ শীতল ছায়াত
পৰি থাকা ভাবনাৰ কোলাত,
আৱেগে তোমাক ৰং সানিব,
কল্পনাই ওমলাব,
তুমি চিন্তা নকৰিবা,
তুমি ওলাই নাহিবা,
বুকুতে থাকা মনটোক নিচুকাই...

শব্দবোৰে তোমাৰ অনুপস্থিতি মোক অভিযোগ কৰে,
তোমাকে বিচাৰে অনবৰতে,
তোমাৰ গাত ওমলিব বিচাৰে থিক কপৌজোপাৰ দৰে,
পাগলবোৰ কৰবাৰ!
খন্তেকতে ধুমুহা আনে আনৰ পথাৰত,
উৰুৱাই আনে ক'ত হৃদয়...
বদমাছ সিহত!
তোমাক পালে উন্মাদ ফাগুন যেন হই পৰে...

মোৰ ডায়েৰিখনো তুমিহিনতাত ভুগিছে,
উকা পাত তাৰ হালধিয়া পৰি গইছে,
তুমি দূখ নকৰিবা
সময়ত নিজেই নীলা হব তাৰ সাজ
তোমাৰ নীলাভ স্পৰ্শত..
তুমি দুখ নকৰিবা
বুকুতে থাকা মনটোক নিচুকাই...
তুমি দুখ নকৰিবা
বুকুতে থাকা মনটোক নিচুকাই..